Banner

Banner

FOLLOW US FACEBOOK

propertyfinder.co.tz

Friday, August 31, 2012

SAKATA la umri wa Elizabeth Michael 'lulu' lapelekwa Mahakama ya Rufani, Septemba 17, 2012...!

 SAKATA  la umri wa msanii wa filamu nchini, Elizabeth Michael maarufu kama Lulu, anayekabiliwa na kesi ya mauaji, sasa limepangwa kusikilizwa na jopo la majaji watatu wa Mahakama ya Rufani, Septemba 17, 2012.
Lulu anakabiliwa na kesi ya mauaji katika Mahakama ya Hakimu Mkazi Kisutu ,akituhumiwa kumuua msanii mwenzake, Steven Kanumba. Anadaiwa kutenda kosa hilo April 7, 2012, nyumbani kwa marehemu, Sinza jijini Dar es Salaam.

Habari zilizopatikana kutoka mahakamani hapo na kuthibitishwa na mmoja wa mawakili  wa msaniii huyo, zinaeleza kuwa , shauri hilo litasikilizwa na jopo la majaji watatu wa Mahakama  ya  Rufani ambao ni January Msoffe, Bernard Luanda na Katherine Oriyo.

Mahakama ya Rufani itafanya marejeo ya uamuzi wa Mahakama Kuu kuona kama ulikuwa ni sahihi, kukubali kufanya uchunguzi wa umri halali wa mshtakiwa huyo, kufuatia maombi yaliyowasilishwa na upande wa mashtaka.
Umri wa mshtakiwa huyo umezua utata baada

ya mawakili wanaomtetea  kuomba kesi yake isikilizwe katika Mahakama ya Watoto (Juvenile Court) wakidai kuwa bado ni mtoto.
 Mawakili hao wanaomtetea mshtakiwa huyo ni, Kennedy Fungamtama (Kiongozi wa jopo), Makamu wa Rais wa Chama cha Wanasheria Tangantyika(TLS) Peter Kibatala na Fulgence Massawe wa Kituo cha Msaada wa Kisheria na Haki za Binadamu (LHRC). 
Mei 7, 2012, mawakili hao waliiomba mahakama ya Hakimu Mkazi Kisutu iruhusu kesi hiyo isikilizwa katika Mahakama ya Watoto wakidai kuwa, mshtakiwa huyo ni mtoto kwa kuwa  ana umri wa miaka 17 na sio 18 kama hati ya mashtaka inavyoonyesha.
Hata hivyo Mahakama hiyo iliyakataa maombi hayo baada ya kupingwa na upande wa mashtaka ulioongozwa na wakili wa Serikali  Elizabeth Kaganda ambaye aliomba wapewe muda zaidi kwa kuwa bado upelelezi ulikuwa ukiendelea na kwamba upelelezi huo unahusisha  suala la umri. 

Wakili Kaganda aliongeza kuwa hata jina la mshtakiwa katika cheti cha kuzaliwa kilichotajwa na mawakili wake, linasomeka kamam Diana Elizabeth wakati mahakamani mshtakiwa anatambulika kama Elizabeth.


Katika uamuzi wake, Hakimu Mkazi Agustina Mmbando alisema kuwa kwa kuwa kesi hiyi ni ya mauaji na upelelezi haujakamilika, mahakama haiwezi kuamua hoja yoyote, badala yake aliutaka upande wa utetezi kuwasilisha maombi hayo Mahakama Kuu.


Kufuatia uamuzi huo, Mei 15, 2012 upande wa utetezi uliwasilisha maombi Mahakama Kuu ukiomba mahakama hiyo iamuru kuwa Mahakama ya Kisutu ina uwezo wa kufanya uchunguzi wa umri halali wa mshtakiwa huyo au Mahakama Kuu yenyewe iamue  kuchunguza umri wa mshtakiwa.


Juni 11, Mahakama Kuu ilikubali maombi ya mawakili wa mshtakiwa huyo kufanya uchunguzi wa umri sahihi wa mshtakiwa huyo, baada ya Mahakama ya Kisutu kuyakataa.

Mahakama Kuu ilitarajiwa kuanza uchunguzi huo wa umri halali wa mshtakiwa huyo Juni 25, 2012, kwa kusikiliza hoja za kila upande na kupitia vielelezo mbalimbali kuhusu umri wa mshtakiwa huyo.

Hata hivyo hatua hiyo ilikwama na kulazimika kusimama baada ya upande wa mashtaka  kuitaarifu kuwa umewasilisha Mahakama ya Rufani  maombi ya marejeo ya uamuzi wa Mahakama Kuu kukubali kufanya uchunguzi wa umri wa mshtakiwa huyo, kama ulikuwa sahihi. 

Vielelezo vilivyowasilishwa Mahakama Kuu na upande wa mshtakiwa ambavyo ni hati za viapo vya wazazi wa mshtakiwa (mama, Lucresia Augustin Kalugila na baba, Michael Kimemeta), cheti cha kuzaliwa na cha ubatizo vya mshtakiwa vinaonesha kuwa ana umri wa miaka 17. 

Vinaeleza kuwa mshtakiwa huyo alizaliwa April 16, 1995  katika kituo cha Afya Muhimbili na kupewa cheti cha kuzaliwa namba B.0318479 cha Julai 23, 2004. 

Lakini vielelezo ya upande wa mashtaka navyo vinaonyesha kuwa mshtakiwa huyo ana umri wa zaidi ya miaka 18 yaani miaka 21.  Vielelezo ni pamoja na maelezo ya mshtakiwa huyo aliyoyatoa polisi wakati alipohojiwa kuhusiana na tuhuma zinazomkabili, maombi ya hati ya kusafiria (Passport) na maombi ya leseni ya udereva. 
 Pia kuna mkanda wa video aina ya CD ya mahojiano kati ya mshtakiwa huyo na mtangazaji wa kituo kimoja cha runinga nchini.

WATU WATATU WAMEFARIKI DUNIA MKOANI KILIMANJARO KATIKA MATUKIO MATATU TOFAUTI...!

WATU watatu wamefariki dunia mkoani kilimanjaro katika matukio matatu tofauti likiwemo la mtu mmoja kuuwawa kikatili kwa kuchinjwa kama kuku hadi kufa katika kijiji cha Levomoro Kilema Kusini wilayani Moshi jimbo la Vunjo.
Akizungumzia tukio la kwanza kamanda wa polisi mkoani Kilimanjaro Robert Boaz, alisema kuwa tukio hilo lilitokea Agusti 29 mwaka huu majira ya saa moja na nusu usiku katika eneo la Kilema Kusini kijiji cha Levomoro kukutwa maiti ya Gasper Nyange (40) nyumbani kwake akiwa amechinjwa kikatili.
Alisema kuwa maiti hiyo ilikutwa nyumbani kwake alipokuwa akiishi marehemu ikiwa imechinjwa kama kuku shingoni katika eneo hilo na kwamba maiti hiyo iligunduliwa na ndugu yake marehemu Matias William mara baada ya kumtembelea kaka yake nyumbani kwake.

Aidha kamanda boaz alisema kuwa mara baada ya ndugu yake huyo kuona hali hiyo alitoa taarifa polisi ambopo jeshi la polisi limewashikilia watu wawili kutokana na kuhusika na tukio hilo na kuwataja kwa majina kuwa ni Jacob Kimaro(40) pamoja na Eliuruma Stephen (19) na kwamba chanzo cha mauaji hayo ni ugomvi baina yake na watuhumiwa hao.

Boaz aliezea tukio jingine kuwa ni gari kumgonga mtembea kwa miguu akijaribu kuvuka barabara na kufariki dunia papo hapo katika barabara ya Mobogini eneo la kwa Elia wilayani Moshi Vijijini.
Alisema kuwa gari lenye nambari za usaji T 839 APD Toyota haisi iliyo kuwa ikiendeshwa na dereva ambaye hajafahamika ikitokea Moshi mjini kwenda Mabogini ilimgona mtembea kwa miguu Giras Michael(34) na kufariki dunia papo hapo na kwamba jeshi la polisi linamsaka dereva huyo kutokana na kukimbia baada ya ajali hiyo.

Akizungumzia tukio jingine kamanda Boaz alisema kuwa lilitokea agusti 29 majira ya saa sita mchana katika eneo la Ushirika Mansipaa ya moshi mkoani hapa ambapo aliuwawa Hussen Musssa (27) na wananchi wenye hasira kwa kumshambulia na mawe pamoja a marungu wakimtuhumu kuiba begi lenye  laptop.

WIZARA YA AFYA NA USTAWI WA JAMII WAMEJIWEKEA MIKAKATI MAALUMU YA KUUNDA BODI KWA KILA HOSPITALI ZA RUFAA...!

WIZARA ya afya na ustawi wa jamii wamejiwekea mikakati maalumu ya kuunda bodi kwa kila hospitali za rufaa ikiwa ni pamoja na  kuboresha usimamizi  na utekelezaji wa majukumu ya watumishi  lengo likiwa ni  kuleta mabadiliko   endelevu katika sekta ya afya nchini.
Akizungumza mwakilishi kutoka katika wizara  hiyo Januarius Soko, wakati wa ukaguzi wa maeneo mbalimbali yaliokuwa kwenye maboresho pamoja na kujionea changamoto mbalimbali linazoikabili  hospitali ya mkoa wa Kilimanjaro Mawezi.
Alisema kuwa moja ya mikakati hiyo ni kuwashirikisha wananchi katika kusimamia huduma za afya , utekelezaji  utawala wa sheria , kukasimu madaraka na uwezo wa kusimamia katika ngazi ya mkoa.
Aidha alisema pamoja na wizara hiyo kuwa makini na kuanzisha bodi za kusimamia huduma za afya pia amewataka wananchi kujitokeza kufanya shughuli mbalimbali za kimaendeleo katika swala zima la kuboresha maendeleo huku wakitambua mikakati na fedha wanazozitoa  zinatumika  kwa   miradi iliyokusudiwa.
 Kwa upande wake mwenyekiti wa chama cha wafanyabiashara na wakulima mkoa wa Kilimanjaro,  Patrick Boysafi ambaye anatarajiwa kuwa mjumbe katika bodi  hiyo aliwataka watumishi katika hospitali hiyo wakiwemo wauuguzi kuwa na moyo wa kizalendo katika kuendelea kutoa huduma ka wagonjwa.
Nao baadhi ya wagonjwa walikuwepo katika hospitali hiyo kwa ajili ya matibabu waliipongeza wizara ya afya maendeleo na ustawi wa jamii kwa kuanzisha bodi hizo kwani wananchi wengi wataendelea kupata huduma bora na kushiriki shughuli za maendeleo .

Mwanafunzi wa shule ya msingi afariki dunia baada ya kushika Mota...!

MWANAFUNZI wa shule ya msingi  Mkapa, Matayo John (9) iliyopo  wilayani
same mkoani kilimanjaro, amefariki dunia baada ya kushika mota
iliyokuwa  imewashwa
kwa ajili ya kupandisha  maji ya kisima.

Kamanda  wa polisi mkoani hapa Robert Boaz, amethibitisha  kutokea kwa
tukio hilo na kwamba lilitokea august 29 mwaka huu majira ya 11:30 wilayani
humo wakati mtoto huyo akicheza na wenzake.

Kamanda alisema mtoto huyo aligusa mita ya kupandishia maji ya kimasima
ambayo ilikuwa imewashwa na kufariki kwa kupigwa shoti ya umeme.

Boaz alisema mota hiyo ilikuwa nyumbani kwa Rajabu Abdala ambapo marehemu
huyo alikuwa akicheza maeneo hayo akiwa na wanzake.

Kamanda amewataka wazazi na walezi kuangalia watoto wao wakati wanatumia
vitu vinavyoweza kuhatarisha maisha yao ili kuweza kuepusha vifo visivyo
vya lazima kwa watoto.

WAZIRI MKUU AMEWATAKA WAJUMBE WA KAMATI YA USHAURI YA MKOA WA KATAVI WAANDAE MPANGO WA MAENDELEO...!

WAZIRI MKUU Mizengo Pinda amewataka wajumbe wa Kamati ya Ushauri ya Mkoa wa Katavi (RCC) waandae Mpango wa Maendeleo wa Mkoa ambao utawasadia kuwaongoza kuendesha mkoa huo mpya.
Waziri Mkuu ametoa changamoto hiyo leo (Ijumaa, Agosti 31, 2012) wakati akizungumza na wajumbe wa kamati hiyo kwenye mkutano wa siku moja uliofanyika kwenye ukumbi wa Idara ya Maji mjini Mpanda. Waziri Mkuu aliizindua rasmi kamati hiyo leo.
Alisema RCC ni lazima ikae chini na kutazama wamejipanga vipi kuendesha mkoa huo mpya. “Lazima muandae Mpango wa Maendeleo wa Mkoa ambao utawiana na Mpango wa Maendeleo wa Taifa wa Miaka Mitano... Hili jambo haliepukiki, litasaidia kutengewa Bajeti kwa sababu tutakuwa tuko kwenye matakwa ya Mpango wa Taifa,” alisema.
Akigusia kuhusu ushirikishwaji wa maamuzi kuanzia ngazi ya chini, Waziri Mkuu alisema kwa vile ratiba ya RCC ni kukutana mara mbili kwa mwaka, wanaweza kuandaa mpangokazi na kisha wakaipeleka kwenye ngazi za wilaya ili ijadiliwe kuanzia huko.
“Ikibidi baadhi ya masuala mnaweza kuyapeleka kwenye ngazi ya mabaraza ya madiwani ili yaanze kujadiliwa huko, halafu yaletwe kwenye Kamati ya Ushauri ya Wilaya na hatimaye vikifishwe kwenye ngazi ya Mkoa,” alisema.
Akizungumzia kuhusu maendeleo ya mkoa huo mpya, Waziri Mkuu alisema wajumbe wa kamati hiyo wanapaswa kujiuliza hali ya maendeleo ilivyokuwa wakati wakiwa ni wilaya tu chini ya mkoa wa Rukwa na kisha wajipime wanataka kwenda wapi kwa sasa wakiwa ni mkoa mpya.
“Nawaomba sana mjiulize pato la mwananchi kwa mwaka (GDP) lilikuwaje wakati tukiwa chini ya Rukwa na kwa sasa tumeshakuwa mkoa mpya, je pato hilo kwa mwaka litakuwaje, nini kitasaidia kuongeza pato la huyu mwananchi... ni lazima tujipange vizuri ili tuonyeshe tofauti,” alisisitiza.
Akizungumzia kuhusu hali ya umaskini inayoukabili mkoa huo, Waziri Mkuu Pinda alisema anakerwa na hali ya umaskini wa kipato inayowakabili wakazi wa mkoa huo na kamwe hataki kusikia hali hiyo ikiendelea kuimbwa kila siku kwa sababu hakuna sababu ya kubakia kuwa maskini.

“Mkoa wa Katavi bado ni maskini... sitaki tuwe maskini kwa sababu hatuna sababu ya kuwa maskini. Na kama tutaendelea kuwa maskini, basi tutaponzwa na uwezo mdogo wa kufikiri wa wataalamu wetu,” alionya na kuongeza kuwa yeye anaamini kwamba: “Katavi bila umaskini inawezekana.”
Aliwataka wajumbe wa kamati hiyo kushirikiana bila kujali itikadi wala imani zao bali aliwataka waweke mbele suala la maendeleo ili kuweza kutoka hapo walipo kimkoa kwa kwani fursa walizonazo ni nyingi na wakazi wa mkoa huo ni wachapakazi sana.
Alimtaka Mkuu wa Mkoa huo, Dk. Rajab Rutengwe kubuni utaratibu wa kuwagawa wajumbe wa kamati kwenye kamati ndogondogo za kisekta na kuwapangia majukumu ili iwe rahisi kufuatilia utekelezaji wa maamuzi wanayoyafikia kisekta.
“RC usingoje kuandikiwa kila kitu... kazi ya kusukuma maendeleo inataka ubunifu. Wagawe wajumbe kwenye kwenye kamati ndogo za kisekta lakini cha msingi uwape mjumbe mmoja kutoka kwenye sekretarieti ili awasaidie kuwaongoza,” alisema.

Jeshi la Polisi mkoani Kilimanjaro linawashikilia wahamiaji haramu 24...!

Jeshi la Polisi mkoani Kilimanjaro linawashikilia wahamiaji haramu 24 ambao walikuwa wakihifadhiwa katika nyumba ya mkazi mmoja katika kijiji cha Jipe wilayani Mwanga.
Akizungumza na chanzo chetu makini, kaimu kamanda wa polisi mkoani Kilimanjaro Costantine Maganga amesema kuwa wahamiaji hao wameingia nchini agusti 30
mwaka huu na kuhifadhiwa nyumbani kwa Bwana Yasin Mrutu.

Amesema raia hao wametokea nchini Ethiopia  na kufika nchini kinyemela, kwa lengo la kuelekea Afrika ya kusini  kwa kupitia nchini Zambia.
Kamanda Maganga ameongeza kuwa juhudi za wananchi wa wilaya hiyo za kutoa taarifa kwa jeshi la polisi ndizo zilizofanikisha kukamatwa kwa wahamiaji hao haramu.

Aidha amewataka wananchi hao kuendelea kushirikiana na jeshi la polisi ilikusaidia na kufanikisha utendaji kazi wa jeshi hilo ambalo kwa kiasi kikubwa limekuwa likifanya kazi kwa karibu kabisa na wanajamii.

DR SLAA AMJIBU WAZIRI SITTA, NA KUIBUA MAMBO MAZITO...!

Katibu mkuu huyo wa Chadema Taifa Dkt Slaa ameibua mambo mazito juu ya waziri Sitta na serikali yake katika mkutano huo na kueleza mikakati mbali mbali ya Chadema .


Dkt Slaa akiwa katika mkutano wake na wanahabari mkoa wa Iringa katika ukumbi wa Hoteli ya M.R




katibu mkuu wa Chadema Dkt Slaa akionyesha baadhi ya vielelezo kwa wanahabari leo mjini Iringa


Habari kamili juu ya kile ambacho Dkt Slaa amekisema mkoani Iringa leo utazipata hap hapa.

FC- Kilimanjaro Jana Imeifunga Apollon Solna Fk Goli 5 – 2...!

Thursday, August 30, 2012

SIRI NZITO KUHUSU DIAMOND NA MAMA YAKE...!

SIRI imefichuka! Kumbe mwanamuziki ‘anaye-hit’ kwa sasa katika muziki wa Bongo Fleva, Nasibu Abdul Juma ‘Diamond Platinumz’ na mama yake mzazi, Sanura Khassim ‘Sandra’ walianza kupendana zamani, 

Kwa mujibu wa chanzo makini ndani ya familia hiyo, Sandra ndiye aliyemlea Diamond na kupita katika vipindi vigumu kimaisha baada ya baba yake, Abdul Jumaa kutengana na mama yake ndiyo maana mara nyingi huwa wanaambatana hata kwenye show za msanii huyo ambazo kuna uwezekano wa mzazi huyo kuhudhuria.

“Sandra ndiye aliyemsomesha Diamond kwa shida hivyo hawezi kuacha kumpenda na ndiyo maana kila sehemu akiambiwa awashukuru watu waliomfikisha hapo alipo, huwa mtu wa kwanza kumtaja ni mama yake,” kilisema chanzo hicho na kuongeza: “Wewe msikilize Diamond, huwa anaanza kumshukuru Mungu ‘then’ anafuatia mama yake.”
Chanzo hicho kilitiririka kuwa kuna wakati Diamond hata anasahau suala la kuoa kwa sababu anapata upendo wa kutosha kwa mama yake. Hata mama yake naye ndiyo maana hawezi kuolewa kwa sababu tayari kuna mtu wa kumfariji ambaye ana upendo wa dhati kwake. Sasa maisha yanataka nini tena?

Kwa mujibu wa Diamond mwenyewe, wakati anaanza kuhangaika kuchomoka kimuziki, mama yake alikuwa akimpeleka kwenye ‘talent show’ hivyo mafanikio yake ni dhahiri kuwa yeye ndiyo mwenye mchango mkubwa kuliko mtu yeyote hivyo hawezi kuacha kumpenda daima.

CHAMA CHA WALIMU TANZANIA CHAITAKA SERIKALI KUWARUDISHIA VYEO VYAO BAADHI YA WALIMU WALIOVULIWA...!


Rais wa Chama cha Walimu Tanzania CWT Bw. Gratian Mukoba.

Chama Cha Walimu Tanzania (CWT) kimeitaka serikali kuwafutia mashitaka baadhi ya walimu ambao walifunguliwa kwenye mahakama mbalimbali nchini.
Aidha  chama hicho pia kimeitaka serikali kuwarudishia vyeo vyao baadhi ya Walimu waliovuliwa madaraka.
Rais wa CWT Bw. Gratian Mukoba amesema serikali inafahamu fika kuwa Walimu wanaoanza kazi waliongezewa mishahara kwa sh 33, 600, 00 sawa na asilimia 12.12 tofauti na asilimia 14 inayodaiwa kuongezwa.
Vilevile serikali inatambua kuwa Walimu hawakuridhika na hukumu ya Mahakama Kuu ndiyo maana imeamua kukata rufaa, na pia Serikali inatambua kuwa Walimu wanaweza kurudishwa darasani kwa amri ya Mahakama lakini kamwe haiwezi kujituma kufudisha kwa moyo kwa amri ya Mahakama.
Hata hivyo amesema licha ya kuamriwa na Mahakama kukaa meza moja na serikali, lakini Serikali haijawa tayari kukutana na CWT kwa lengo la kujadili mishahara ya Walimu.
Hivyo kitendo cha Serikali kukaa kimya kwa siku 27 bila kufuata agizo la Mahakama ni wazi kwamba ni kukosekana kwa nia njema ya Serikali ya kusikiliza madai yao.

 Chanzo:  Datus Boniface.

Waziri Mkuu Mizengo Pinda Azindua Bodi ya Barabara ya Mkoa wa Katavi...!

TAARIFA KWA VYOMBO VYA HABARI

 PINDA: NENDENI KUKAGUA BARABARA WAKATI ZINAJENGWA
*Azindua Bodi ya Barabara ya Mkoa wa Katavi

WAZIRI MKUU Mizengo Pinda amewataka wajumbe wa Bodi ya Barabara ya Mkoa wa Katavi kuweka ratiba ya kukagua ujenzi wa barabara na madaraja badala ya kusubiri kuletewa taarifa na watendaji.
Amesema hayo leo mchana (Alhamisi, Agosti 30, 2012) wakati akizungumza na wajumbe wa Bodi hiyo kwenye mkutano wa kwanza wa Bodi hiyo uliofanyika kwenye ukumbi wa Idara ya Maji mjini Mpanda. Waziri Mkuu aliizindua rasmi Bodi hiyo leo.
“Si vibaya mkiamua kuipa Bodi hii ratiba na mkaamua kwenda kuona hali halisi ya ujenzi wa barabara na madaraja au makalavati badala ya kusubiri kuletewa taarifa na watendaji wa idara,” alisema.
Alisema kuna umuhimu wa kujiwekea mazoea ya kwenda kuangalia barabara au madaraja wakati zinajengwa ili kujiridhisha na kiwango cha kazi kinachofanyika pale. “Unaweza usiwe mtaalam wa ujenzi lakini kama kazi ni mbovu si utaiona, si utapata nafasi ya kuhoji kulikoni au kuarifu mamlaka husika?” aliongeza.

Alisema katika mwaka wa fedha 2011/2012 (wakati huo mkoa huu ukiwa ni Wilaya ya Mpanda) zilitolewa sh. bilioni 5.5/- ambazo zimetumika kujenga barabara kwa viwango tofauti vyenye jumla ya kilometa 1,186.62 na madaraja ama makalvati makubwa 52.
Katika kwa mwaka huu wa fedha zimetengwa sh. bilioni 10.65/- ambazo zimepangwa kujenga barabara kwa viwango tofauti zenye urefu wa kilometa 1,310.06 na madaraja pamoja na makalvati makubwa 58.
Alionya kwamba changamoto kubwa waliyonayo wajumbe wa bodi hiyo kwenye suala la kuhakikisha fedha inatumika kama ilivyopangwa, ni uadilifu wa watendaji kwenye vyombo vya usimamizi la sivyo wataibiwa fedha na kuishia kubakia na barabara ambazo ziko chini ya kiwango.
 “Changamoto kubwa mliyonayo ni kuona fedha iliyopangwa inatumika ipasavyo. Ni vema wajumbe wa Bodi mkawa ‘akina Tomaso’, mwende mkakague japo madaraja na makalvati mawili au matatu. Mkifika mtabaini kama limejengwa kwa kiwango kinachostahili, la sivyo mtaishia kukabidhiwa daraja lakini baada ya siku mbili mnasikia limesombwa na maji,” alionya.
Alimtaka Meneja wa TANROADS wa mkoa huo, Mhandisi Isaack Kamwele ahakikishe anafuatilia suala la mizani ya barabarani hata kama ni ya kuhamishika ili kudhibiti ubebaji wa mizigo mizito (overloading) unaofanywa na wasafirishaji wa mazao kutoka eneo la Bonde la Ziwa Rukwa.
“Changamka tupate mizani ya kupima uzito kwa sababu huwezi kumkamata dereva kwa kuzidisha uzito bila kupima kwanza japokuwa kwa macho unauona kabisa kwamba mzigo huu ni mkubwa… tupate japo miwili kwa kuanzia. Mmoja uende barabara ya Mpanda – Inyonga na mwingine kwenye barabara ya kwenda Bonde la Ziwa Rukwa ambako wanasomba mazao kwa wingi,” alisema.
Mapema akimkaribisha Waziri Mkuu kuzindua Bodi hiyo, Mkuu wa Mkoa wa Katavi, Dk. Rajab Rutengwe alisema mkoa huo una kilometa 2,430 za barabara na madaraja 117. Kati ya hizo kilometa 1,101.44 zinahudumiwa na Wakala wa Barabara (TANROADS), kilometa 1,074.10 zinahudumiwa na Halmashauri ya Wilaya ya Mpanda wakati kilometa 251.5 zinahudumiwa na Halmashauri ya Mji Mpanda. “Asilimia 42 ya mtandao wa barabara ni nzuri, asilimia 20 ni za wastani na asilimia 38 ni mbaya,” alisema.
Akizungumzia changamoto zinazoukabili mkoa huo, Dk. Rutengwe alisema ofisi ya TANROADS ya mkoa huo inahitaji walau magari matatu ili iweze kufanya kazi kuliko ilivyo hivi sasa.
Wakati huohuo, Waziri Mkuu Pinda mara baada ya kuwasili Mpanda mjini akitokea kijijini kwake Kibaoni, alikwenda kwenye nyumba ya Askofu  iliyoko Kanisa la Mt. Maria Imakulata la mjini hapa kusaini kitabu cha maombolezo ya kifo cha Mhashamu Askofu Pascal William Kikoti ambaye alifariki dunia Agosti 28, mwaka huu katika Hospitali ya Bugando, jijini Mwanza.

Mwili wa Mhashamu Askofu Kikoti ambaye alikuwa Askofu wa Kanisa Katoliki Jimbo la Mpanda, unatarajiwa kuwasili Mpanda kesho (Ijumaa, Agosti 31, 2012) na mazishi yake yanatarajiwa kufanyika kesho kutwa (Jumamosi, Septemba mosi, 2012.) 
IMETOLEWA NA:
OFISI YA WAZIRI MKUU,
ALHAMISI, AGOSTI 30, 2012.

Mkuu wa Wilaya ya Mbarali, Hawa Ngulume afariki dunia...!

 Hawa Ngulume wakati wa uhai wake..

TAARIFA KWA VYOMBO VYA HABARI

Rais wa Jamhuri ya Muungano wa Tanzania, Mheshimiwa Dkt. Jakaya Mrisho Kikwete ametuma Salamu za Rambirambi kwa Familia ya aliyepata kuwa Mkuu wa Wilaya ya Mbarali, Mama Hawa Ngulume kufuatia taarifa za kifo chake kilichotokea katika Hospitali ya Jeshi Lugalo, Jijini Dar es Salaam alikokuwa amelazwa kwa matibabu akisumbuliwa na ugonjwa wa Saratani. Mama Hawa Ngulume amefariki leo tarehe 30 Agosti, 2012.

Katika Salamu zake hizo, Rais Kikwete amesema Marehemu Hawa Ngulume, enzi za uhai wake, alikuwa kiongozi shupavu aliyesimamia maamuzi yake katika majukumu muhimu ya kitaifa kwa lengo la kuwaletea wananchi maendeleo katika sehemu zote alizotumikia akiwa Mtumishi wa Umma, na baadaye alipopewa wadhifa wa Mkuu wa Wilaya alioutumikia katika Wilaya za Singida Mjini katika Mkoa wa Singida, Kinondoni Mkoani Dar es Salaam na mara ya mwisho katika Wilaya ya Mbarali, Mkoani Mbeya.

“Nilimfahamu Marehemu, enzi za uhai wake, kama Kiongozi Mwanamke shupavu aliyesimamia kikamilifu maamuzi yake, na hivyo kuthibitisha ukweli kwamba wanawake wakipewa fursa wanaweza”,amesema Rais Kikwete katika kuomboleza kifo chake.

“Kutokana na msiba huo mkubwa, natuma Salamu za Rambirambi kutoka dhati ya moyo wangu kwa Familia ya Marehemu, Mama Hawa Ngulume kwa kuondokewa na Mhimili muhimu na Kiongozi wa Familia. Natambua machungu mliyo nayo hivi sasa kwa kumpoteza Mama wa Familia, lakini nawahakikishia kuwa niko pamoja nanyi katika kuomboleza msiba huu mkubwa”, ameongeza kusema Rais Kikwete katika Salamu zake.

Rais Kikwete amewataka wanafamilia ya Marehemu wawe na moyo wa uvumilivu na ujasiri wakati huu wanapoomboleza msiba wa mpendwa wao kwani yote ni Mapenzi yake Mola.  Amesema anamuomba Mwenyezi Mungu, Mwingi wa Rehema aipokee na kuilaza mahala pema peponi Roho ya Marehemu Mama Hawa Ngulume, Amina. 

Imetolewa na:
Kurugenzi ya Mawasiliano ya Rais,
Ikulu.
Dar es Salaam.
30 Agosti, 2012