JK ASEMA MADAKTARI WANAOONA HAWAWEZI KUFANYA KAZI SERIKALINI WAACHE KAZI, DK. ULIMBOKA HAKUWA MTUMISHI A SERIKALI...!

HATIMAYE Rais Jakaya Kikwete amewataka madaktari wote wanaoona hawawezi kufanya kazi serikalini hadi walipwe kiasi cha sh milioni 3.5, waache kazi na kutafuta sehemu nyingine itakayowalipa vizuri.

Aidha, Kikwete ameweka bayana kuwa serikali haitaweza kulipa kima hicho cha chini cha mshahara na nyongeza za posho zitakazomfanya daktari wa ngazi ya chini kulipwa jumla ya sh milioni 7.7 kwa mwezi.

Wakati Rais Kikwete akitoa tamko hilo, Katibu wa Jumuiya ya Madaktari nchini, Dk. Edwin Chitage, ameweka bayana msimamo wao wa kutorejea kazini na kuitaka serikali kuwaleta haraka madaktari kutoka nje kujaza nafasi zao, kama ilivyotangazwa juzi.

Katika hotuba yake kwa taifa jana, Kikwete alisema kuwa haoni sababu ya madaktari hao kugoma na kugombana na mwajiri ili ashinikize kulipwa mshahara huo, badala yake amewataka kuondoa usumbufu huo wa kuondolewa kwa nguvu, kwa wao kuacha kazi kwa amani, na kutafuta sehemu itakayokubali kulipa kiasi hicho.

Rais Kikwete amedai katika tamko hilo la kwanza tangu kuanza kwa mgomo huo wa madaktari wiki iliyopita, kwamba hakukuwa na haja ya madaktari hao kufikia uamuzi wa kugoma, hivyo kuleta madhara makubwa yakiwamo ya vifo kwa wagonjwa hata baada ya serikali kujitahidi kutimiza matakwa yao kwa kiwango kikubwa.

Kikwete ambaye alitumia kigezo cha nyongeza ya mshahara katika hotuba yake kuitetea serikali katika mgogoro huo, alisema itakuwa kuwadanganya madaktari hao na Watanzania kuwa inao uwezo wa kulipa kiasi hicho cha mshahara kutoka kima cha chini cha sh 957,700 cha sasa hadi sh milioni 3.5

“Mwaka 2004/2005, mshahara wa kuanzia wa daktari ulikuwa shilingi 178,700, mwaka 2005/2006 tuliupandisha na kuwa shilingi 403,120. Tuliendelea kuupandisha mwaka hadi mwaka mpaka kufikia shilingi 957,700 wanazolipwa sasa.

“Kiasi hicho ni mara mbili ya mishahara ya watumishi wa taaluma nyingine wenye shahada ya kwanza wanaoanza kazi ambao kwa wastani hupata shilingi 446,100.

“Kwa sasa hatuwezi kuwaahidi kuwa tunao uwezo wa kuwalipa mshahara wa kuanzia wa shilingi 3,500,000 na posho zote zile. 

Tukifanya hivyo malipo ya daktari anayeanza kazi yatakuwa shilingi 7,700,000. Kwa hakika kiasi hicho hatutakiweza. Si vyema kutoa ahadi hewa kwa watu tunaowaheshimu na kuwathamini kama walivyo madaktari,” alisema Kikwete.

Kikwete alisema Mahakama Kuu, Kitengo cha Kazi Machi, 8, 2012, kwa mujibu wa Sheria ya Mahusiano Kazini, Namba 6 ya mwaka 2004 ilitoa zuio la mgomo pamoja na kuagiza kuwepo mazungumzo baina ya pande mbili.

Aliongeza kuwa kati ya Aprili, 10, 2012 na 30 Mei, 30, 2012, vilifanyika vikao sita vya majadiliano kati ya Serikali na Chama cha Madaktari, kujadili madai 12 ya madaktari, ikiwa ni nyongeza ya mshahara kutoka kima cha sasa hadi sh 3.5 milioni. Posho ya kuitwa kazini (on call allowance) asilimia 10 ya mshahara.

Madai mengine ya madaktari yalikuwa kulipwa posho ya kufanya kazi katika mazingira hatarishi (Risk allowance) asilimia 30 ya mshahara, madaktari wapatiwe nyumba daraja A au posho ya makazi ya asilimia 30 ya mshahara, na posho ya kufanya kazi katika mazingira magumu nayo asilimia 40 ya mshahara.

Kikwete alisema madai mengine ya madaktari ni posho ya usafiri ya asilimia 10 ya mshahara au wakopeshwe magari, madaktari wapatiwe Green Card za Bima ya Afya, kuondolewa kwa watendaji wakuu wa Wizara ya Afya na Ustawi wa Jamii, viongozi wa kisiasa kulazimisha kupewa rufaa nje, madaktari waliofukuzwa warudishwe kazini, kuboresha huduma za afya na posho ya uchunguzi wa maiti iongezwe.

Alisema hadi sasa serikali imekubali kutoa Green Card za Bima ya Afya, kuchukuliwa hatua za kinidhamu dhidi ya watendaji wakuu wa Wizara ya Afya.

“ Lakini, jambo la kustaajabisha hata Waziri mpya wa Afya alipowataka waonane kuzungumzia hoja walikataa kumuona. Kwanza walisema hawaoni sababu kwa vile wameyazungumza na kamati yake kwa miezi mitatu bila ya mafanikio.

“ Kuhusu viongozi kulazimisha kupewa rufaa ya kutibiwa nje, Waziri Mkuu, Mizengo Pinda aliwataka wazingatie maadili ya kazi zao na kukataa kutoa rufaa kwa mtu asiyestahili, awe kiongozi au asiwe kiongozi. Pili, walikubaliana kuwa hospitali zilizopo ziboreshwe ili viongozi watibiwe hapa nchini. Ukweli ni kwamba kufanya hivyo ndiyo sera ya Serikali,” alisema.

Aliongeza kuwa serikali pia ilikubali madaktari waliofukuzwa, na wale Interns waliokuwa wamerudishwa wizarani kutoka Muhimbili na kupangiwa hospitali za Temeke, Ilala, Mwananyamala na Lugalo.

Aidha, alisema pande zote walilokubaliana ni kuhusu kuongeza posho ya uchunguzi wa maiti.

“Hili ni jambo jipya halikuwepo mwazoni. Hata hivyo, serikali imelikubali na posho hiyo imeongezwa kutoka shilingi 10,000 hadi kufikia shilingi 100,000 kwa daktari na shilingi 50,000 kwa wasaidizi wake,” alisema.

Serikali iliwaeleza kuwa watumishi wa kada zote za afya watapatiwa chanjo dhidi ya maambukizi ya Hepatitis B na fedha zimetengwa katika bajeti ya 2012/13.

“Serikali imeeleza dhamira ya kurudisha posho ya mazingira hatarishi kwa watumishi wa umma wanaostahili. Utekelezaji wake utafanyika baada ya uchambuzi wa kina wa kubainisha mazingira hatarishi ni yepi, viwango stahiki viwe vipi na nani hasa wahusika.

 Madaktari wamekataa hili la kufanya uchambuzi, wanataka kiwango kiwe kama wanavyotaka wao, yaani asilimia 30 ya mshahara na kianze mara moja,” alisema.

Mambo yaliyoshindikana

Hata hivyo, Kikwete alikiri kuwa kuna mambo mawili hayakufikiwa muafaka kabisa kati ya pande zetu mbili, nayo ni posho ya kuitwa kazini (on call allowance).

“ Kwanza sina budi kueleza kuwa serikali imekubali kuongeza posho hiyo. Tangu Februari, 2012 posho iliongezwa kutoka shilingi 10,000 hadi shilingi 25,000 kwa daktari bingwa (specialist), shilingi 20,000 kwa dakari mwenye usajili wa kudumu (Registrars) na shilingi 15,000 kwa madaktari waliohitimu ambao wapo katika kipindi cha mafunzo kazini (Interns). Viwango hivyo vya posho vinatumika hivi sasa.  

“Madaktari kwa upande wao hawakukubali uamuzi huo wa serikali na kusisitiza walipwe asilimia 10 ya mshahara. Ugumu wa kukubali pendekezo la madakari ni kuwa sharti la malipo haya ni mtu kuitwa kazini. 

Ukitaka ilipwe kiwango cha mshahara ina maana kuwa hata kama daktari hakupangwa kuitwa au alipangwa na hakutokea aendelee kulipwa. Hili haliwezi kuwa sahihi kufanya.

 Linaweza kuwafanya baadhi ya madaktari kutokutimiza wajibu wao kwa vile wana hakika mwisho wa mwezi malipo yako pale pale,” alisema.

Alidai jambo la pili ambalo muafaka haukufikiwa baina ya serikali na madaktari ni kuhusu mshahara wa kuanzia kazi wa daktari, ambao wanataka uwe shilingi 3,500,000 wakati serikali imesema kiasi hicho hawakiwezi, badala yake ipo tayari kuongeza mshahara kwa kati ya asilimia 15 mpaka 20 kama ambavyo itafanya kwa watumishi wote wa umma katika mwaka huu wa fedha.

“Kwa kiwango cha sasa cha mshahara wao, daktari ataanzia kati ya shilingi 1,100,000 na 1,200,000 kutegemea kiwango kipi hatimaye kitaamuliwa. Madaktari wamekataa katakata na wameng’ang’ania shilingi 3,500,000,” alisema.