VIONGOZI WA NGO WATAKIWA KUMWOGOPA MUNGU...!

Na, Venance Mtinya, Mbeya

BAADHI  ya Asasi za kiraia zinazojihusisha na huduma ya kulea watoto wanaoishi katika mazingira magumu hapa nchini hujinufaisha wenyewe badala ya walengwa.

Hayo yalibainishwa na Mkurugenzi wa asasi ya Child Prospective Organization ya Jijini Mbeya, Zahara Mansour, wakati wa hafla ya chakula  cha pamoja na watoto waishio kwenye mazingira magumu iliyofanyika katika viwanja vya Airport Pub Jijini hapa juzi.

Mansour alisema baadhi ya wamiliki wa asasi za kiraia si waaminifu kwa kuwa wanatumia mgongo wa watoto yatima kujinufaisha wao wenyewe huku wakisingizia wanawalea bila wao kunufaika na chochote.

Alisema watoto wa mitaani ni wengi mno kiasi kwamba bila moyo wa huruma na kujitolea hali itazidi kuwa mbaya kutokana na maambukizi ya Virusi vya Ukimwi kuongezeka kitu ambacho kinasababisha ongezeko la watoto yatima.

“ Baadhi yetu si waaminifu kabisa kwa sababu wanapata misaada kwa ajili ya kulelea na kuhudumia watoto wa mitaani lakini watoto wenyewe kawanufaiki na badala yake utaendelea kuwakuta mitaani wanazurura ovyo na ukifuatilia utagundua kuna mtu ananufaika kupitia mgongo wao” Alisema Mkurugenzi huyo.

Aliongeza kuwa wengine wamekuwa wakitoa takwimu za uongo wakati wa kuomba misaada hiyo kutoka kwa wahisani lakini ukiwaambia wawakusanye hao watoto hutofautiana na idadi aliyoombea msaada.

“ Unajua watu wengine si waaminifu utakuta anaandika maombi ya msaada akidai anawatoto 50 anaowalea lakini  ukiangalia kiuhalisia anakuwa na watoto wasiozidi hata kumi kitu ambacho wengine wanakuwa vivuli tu, hivyo wito wangu naomba wabadilike wamuogope Mungu maana hawa watoto hawakupenda kuwa yatima na kuishi mitaani” alifafanua Zahara Mansour.

Hafla hiyo ilihudhuriwa na watoto wa mitaani zaidi ya 50 kutoka asasi mbalimbali za Jijini Mbeya huku msaada wa vinywaji ukitolewa na kampuni ya vinywaji ya Cocacola, chakula kilitolewa na uongozi wa Airport Pub ambapo kampuni ya saruji Mbeya cement wakitoa fulana na madaftari.