WANANCHI WA ARUSHA WAGOMEA MRADI WA MABILIONI YA FEDHA...!

MRADI wa ujenzi  dampo la kisasa wenye thamani ya shilingi bilioni 3 unofadhiliwa na benki ya dunia katika jiji la Arusha, upo hatari  kuyeyuka kufuatia wananchi wa kata ya Muriet manispaa ya Arusha kugoma kupisha eneo la  mradi huo licha ya kulipwa stahili zao .

Aidha mradi huo ambao ulikuwa uanze tangu april mwaka jana umeshindwa kuendelea kutokana na mvutano mkali ulipo kati ya wananchi zaidi ya 200 na manispaa ya jiji la Arusha ,ambapo wananchi hao wameilalamikia manispaa hiyo kwa kushindwa kuwalipa fidia ya maeneo yao waliyoyaendeleza ,huku manispaa hiyo ikidai imeshawalipa.

Akizungumzia swala hilo , Mkurugenzi wa manispaa ya Arusha, Estomih Changa’h alikiri wananchi hao kuwa kikwazo cha kuanza kwa mradi huo huku akidai kuwa wafadhili wa mradi huo ambao tayari walionyesha nia na kuja na kupima katika eneo hilo wameanza kukata tamaa.

Alifafanua kuwa , baada ya kufanya tathmini ya awali mwaka jana walibaini kuwa wananchi 42 ndio  waliopo ndani ya  eneo husika la mradi ,hivyo manispaa ya Arusha ilifanya tathimin na kukubali kuwalipa  kiasi cha shilingi milioni 252 kama fidia ya makazi yao.

‘’tulipofanya tathimini ya makazi yao tulikubaliana kuwalipa wakazi hao 42,na kila mtu alipigwa picha akiwa amesimama mbele ya eneo ama nyumba yake,sasa tunasikitika sana kuona wakiendelea kunga’ng’ania huku kundi lingine la watu zaidi ya 200 wakiibuka kutaka nao walipwe fidia’’alisema Chang’ah

Alisisitiza kuwa,tayari manispaa imeshawalipa wananchi 33 kati ya 42 kwa kiwango tofauti na kubaki wananchi tisa tu ambao walikuja kurubuniwa na kugomea malipo hayo.

Changáh aliongeza kuwa, baada ya kumaliza kuwalipa fidia wananchi hao, anashangazwa kuibuka kwa kundi lingine la wananchi zaidi ya mia mbili kuanza kudai kuwa wanahitaji nao kulipwa fidia za maeneo yao ili kupisha mradi huo wa dampo la kisasa.

Aliongeza kuwa, wananchi hao wamekuwa wakifika katika ofisi ya manispaa ofisi ya mkuu wa mkoa wa Arusha kudai fidia zao ambapo wamekuwa wakijaribu kuwaelewesha na uendesha vikao kadhaa, lakini wamekuwa wagumu kuelewa .

Hata hivyo Changáh alitumia fursa hiyo kuwataka wananchi wa mkoa wa Arusha, kuukubali mradi huo na kuunga mkono kwani  ni muhimu sana na utaondoa tatizo sugu la mlundikano uchafu na hadha ya harufu kali kwa wakazi wa eneo la Muriet lililopo dambo la sasa.

Aidha alisema mradi huo utakapokamika utaongeza madhari ya jiji la Arusha kuwa safi  na pia utakuwa na uwezo wa kuzalisha umeme pamoja na kutoa ajira kwa vijana na wakazi wa eneo hilo.

Kwa upande wa wananchi hao,wamedai kuwa manispaa hiyo imeshindwa kuwalipa fidia na kutumia ubabe kuwahamisha katika eneo hilo baada ya kuwarubuni wenzao wachache na kuwalipa fidia ndogo, hatua ambayo wameapa kukwamisha mradi huo kwa kutohama katika eneo hilo.

Mwenyekiti  wa kamati ya waathirika hao ,Jackson Japhet alisema kuwa, wao wanachotaka ni kutaka kulipwa fidia stahili ya makazi yao kwani  wengi wa wananchi wamekuwa wakiishi hapo muda mrefu na wamekuwa na makazi ya kudumu ,hivyo ni ngumu sana wao kuondoka katika eneo hilo.

Wakizungumza katika kikao cha hadhara katika eneo hilo la Muriet mwishoni mwa wiki, wameazimia kwenda mahakamani kusimamisha uanzishaji wa mradi huo  hadi manispaa hiyo itakapofanya tathimini upya kwa kuwashirikisha wananchi hao na kuwalipa fidia stahili bila kuwapunja.