MWANZO WA MUZIKI WA KIZAZI KIPYA SIO BONGO FLEVA..!

Leo nimeamua kusawazisha dhana potofu hususan kuhusu muziki wa vijana ambao wapigaji wake ni vijana, mashabiki wake ni vijana na hata wengi wa wadau wake ni vijana pia.

Na wengi huchukulia kimakosa kuwa bongo-fleva ni muziki wa kizazi kipya, inaweza kuwa sawa kwa sasa, lakini pia inaweza kuwa si sawa kwa kuwa bongo-fleva si kizazi kipya cha kwanza hapa nchini.

Hali ya muziki huo kuitwa wa kizazi kipya inaweza kuwa imesababishwa na ule mshawasha wa kutaka kujitambua, kutokana na sababu mbalimbali tutakazozianika kwenye mada yetu ya leo.

Kwanza tuelewane kuwa kama siku zinavyokwenda na kusababisha miaka ipite, hata muziki nao huathiriwa na wakati kutokana na mahitaji husika ya jamii kwa wakati husika.

Na hiyo husababisha kaliba jipya la kizazi cha umri fulani, ambacho huja na ubunifu wake na kutaka kujitambua katika mabadiliko ya wakati unaowahusu zaidi wao wenyewe kwa kizazi chao.

Kutokubalika huchochea kizazi kijitambue mdau wangu, kwa msingi wa niliyoyaeleza hapo juu nikufahamishe kuwa, kwa hapa nchini kizazi kipya cha kwanza kimuziki kilianza mnamo kabla ya miaka ya mwishoni mwa 1950 kutokana na sababu zilizokuwepo wakati huo.

Hiyo ilitokana na wanamuziki wa kwanza kabisa wa muziki wa dansi, kuacha kunakili nyimbo za Kizungu kutoka kwenye santuri na kutumbuiza kwenye social clubs.

Badala yake wakagubikwa na homa ya Kilatino (Latino Fever), iliyolikumba eneo kubwa la Afrika kuanzia Afrika Magharibi, Kati na Mashariki, kwa kuwa mipigo ya Kilatino ilishabihiana vyema kabisa na mipigo ya Kiafrika.

Hilo halikutokea kwa bahati mbaya, kwa kuwa nchi za Ulatino (Marekani Kusini) zina vizazi vingi vya watu ambao ni matokeo ya uzao mchanganyiko wa Waafrika na watu wa Ughaibuni.

Na haishangazi ule muziki wao kuwa na chembe chembe za Kiafrika, kama ulivyo muziki wa Wamarekani weusi au Marasta wa Carribean au wapigani wa mitindo kama cumbya, charanga, patcheco, merengue nakadhalika, walioko kwenye visiwa vya Cuba, West Indies, Guyana, Dominica, Jamaica na Haiti.

Tukirudi hapa nchini, wakoloni hawakupenda kabisa muziki wa kizazi kipya wa wakati huo hivyo waliushutumu sana. Lakini hawakuweza kuuzuia maana watu waliupenda zaidi muziki huo, kuliko ule muziki wao wa kikasumba (wa kikoloni).

Kwa maana hiyo ukihesabu kutoka hapo, kuna urithi wa wanamuziki wengi tangu wakati huo na wote hao ni kizazi kipya kwa maana ya awamu mpya kimuziki.

Vuka toka hapo hadi nyakati za kina Salum Abdallah, Juma Kilaza, kisha tuama katika nyakati za kina Mbaraka Mwinshehe hadi zama za kina Marijani Rajabu, halafu kizazi cha kina Hemedi Maneti, Hamza Kalala, Juma Ubao na hadi kufikia kizazi cha kina Shabani Dede, Hassan Bitchuka na kizazi cha sasa cha mtiririko huo huo sawia.

Kuna wanamuziki wengi na hatuwezi kuwataja wote, lakini tofauti ya vizazi hivyo na hiki cha sasa ni aina ya muziki na kurithishana ujuzi kama nitakavyoeleza kwenye sehemu ya kipengele kinachofuata.

Ukiangalia vizazi vilivyopita, ni kwamba vilirithishana ujuzi kutokana na kupiga muziki unaorandana au wa aina moja.

Kwa hiyo ushirikiano wa vizazi hurithisha ujuzi muhimu baina ya kizazi kinachopokea kutoka kilichopita, kisha huendeleza ujuzi husika. Ubunifu huongezeka na kila ubunifu mpya wa wanamuziki wapya ni kizazi kipya, lakini kwa bongo-fleva kuna tofatuti na vizazi vingine tulivyovitaja.

Kwanza ni mtindo uliokumbatia silika za utamaduni uliokuja nyakati za baadaye, baada ya kufunguliwa milango kwa mabadiliko ya sera za kisiasa hapa nchini.

Ni Utamaduni wa kigeni ambao walioanzisha bongo-fleva waliuchanganya na mambo ya nyumbani, ili kupata kilichoitwa muziki wa nyumbani wenye ladha ya kimataifa.

Tumeshawahi kueleza jambo hili tulipochambua reggae, bongo-fleva na hip-hop kwenye safu hii.

Kwamba hii inayoitwa bongo-fleva kimsingi iliundwa na wanamuziki wa reggae na rap wa hapa nchini, ambao waliamua kuungana baada ya kutengwa na wahafidhina waliowaona kama tishio kwa mirindimo yao ya dansi.

Na hata jina la mtindo huo lilitokana na kujitetea kwa wana-reggae na wana-rap hao dhidi ya shutuma walizoelekezewa, kwa kudai kwamba wanachokipiga wao ni fleva za Kibongo kimataifa.

Baadaye maneno hayo yakabadilishana nafasi, neno ‘Bongo’ likawa mwanzo na ‘fleva’ mwisho na kuzalisha jina la bongo-fleva.

Lakini hadi wakati huo maneno hayo yanabadilishana nafasi, wanamuziki wa reggae na rap wakawa wameshajitenga na mkusanyiko huo wa uasisi.

Hiyo ilitokana na muziki huo kuingiliwa na vijana walioonekana kutokuwa na silika za ukweli halisi wa muziki huo, hapo ndipo silika za ubitozi na mapenzi zikatawala mno ndani ya muziki huo.

Hiyo ikarejesha upya zile shutuma kuwa ni muziki wa kizazi kipya kutoka kwa wale wahafidhina wa kwanza, ambao kuna wakati waliukubali baada ya kuona waasisi wa mwanzo wakipiga muziki hai.

Lakini shida kubwa inayosababisha kusiwe na muendelezo wala kurithishana baina ya wanamuziki wa bongo-fleva, ni kutokubali kwao kuchota ujuzi kwa wakongwe wa muziki hata kama hawapigi mitindo kama yao.

Lakini ajabu moja wakishaamua kuvuka madaraja ya mafanikio na kuanzisha bendi, huelemea kwenye mirindimo hiyo hiyo ya wakongwe ambao huwakacha mwanzoni.

Naomba niishie hapa

By Chalii wa Moshi